20.03.2022 ತಾರಿಕೆರ್ ಆಯ್ತಾರಾ ಸಕಾಳಿಂ 8 ವೊರಾಂಚಿ ದೇವ್ ಸ್ತುತಿ ಕ್ರಿಸ್ತಾಂವ್ ಶಿಕ್ಷಣಾಚ್ಯಾ ಭುರ್ಗ್ಯಾಂನಿ ಮಾಂಡುನ್ ಹಾಡ್ಲಿ . ಮಿಸಾಚಾ ಬಲಿದಾನಾಚೆ ಪ್ರಸ್ತಾವನ್ ಆನಿ ಪ್ರಾಚಿತಾಚಿ ರೀತ್ ಬೋವ್ ಅಪುರ್ಬಾಯೆನ್ ನಾಟ್ಕುಳ್ಯಾ ರುಪಾರ್ ಭುರ್ಗ್ಯಾಂನಿ ಸಾದರ್ ಕೆಲಿ . ಪ್ರಧಾನ್ ಯಾಜಕ್ ಜಾವ್ನ್ ವಿಗಾರ್ ಬಾಪ್ ಆಲ್ಫ್ರೇಡ್ ಜೆ ಪಿಂಟೊ ಆನಿ ಸಹಾಯಕ್ ವಿಗಾರ್ ಬಾಪ್ ವಿನೋದ್ ಲೋಬೊನ್ ಮಿಸಾಚೆಂ ಬಲಿದಾನ್ ಭೆಟೈಲೆಂ . ಬೋವ್ ಮಧುರ್ ತಾಳ್ಯಾಂನಿ ಭುರ್ಗ್ಯಾಂನಿ ಕೊಯರ್ ಚಲೊವ್ನ್ ವೆಲೆಂ .

ಮಿಸಾ ನಂತರ್ ರುಜಾಯ್ ಕಲ್ಚರಲ್ ಸಾಲಾಂತ್ ಮಟ್ವೆಂ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲೆಂ . ಪಯ್ಲೆ ವೆದಿ ಕಾರ್ಯೆಂ ಉಪ್ರಾಂತ್ ಕ್ರಿಸ್ತಾಂವ್ ಶಿಕ್ಷಣ್ ಪರಿಕ್ಷೆಂತ್ ಅತೀ ಊಂಚ್ ಅಂಕ್ ಜೊಡ್ಲೆಲ್ಯಾ ವಿದ್ಯಾರ್ಥಿಂಕ್ ಅನಿ ಚುಕಾನಾಸ್ತಾನಾ ದೊತೊರ್ನಿಚಾ ಕ್ಲಾಸಿಕ್ ಹಾಜಿರ್ ಜಾಲ್ಲ್ಯಾ ಸರ್ವ್ ವಿಧ್ಯಾರ್ಥಿಂಕ್ ಉಡಾಸಾಚಿ ಕಾಣಿಕ್ ವಾಂಟ್ಲಿ. ವೆದಿಚೆರ್ ವಿಗಾರ್ ಬಾಪ್ ಆಲ್ಫ್ರೇಡ್ ಜೆ ಪಿಂಟೊ ಆನಿ ಸಹಾಯಕ್ ವಿಗಾರ್ ಬಾಪ್ ವಿನೋದ್ ಲೋಬೊ, ಕ್ರಿಸ್ತಾಂವ್ ಶಿಕ್ಷಣಾಚಿ ಸಂಚಾಲಕಿ ಭಯ್ಣ್ ಲವೀನಾ ಅನಿತಾ , ರುಜಾಯ್ ಫಿರ್ಗಜ್ ಗೊವ್ಳೀಕ್ ಪರಿಶದೆಚೆ ಉಪಾಧ್ಯಕ್ಷ್ ಮಾನೆಸ್ತ್ ಗಿಲ್ಬರ್ಟ್ ಡಿ ಸಿಲ್ವಾ ಆನಿ ಕಾರ್ಯದರ್ಶಿ ಮಾನೆಸ್ತಿನ್ ಹೆಝಿಲ್ ಮಿನೇಜಸ್ ಹಾಜರ್ ಆಸ್‍ಲ್ಲಿಂ.

ಬಾಪ್ ವಿನೋದ್ ಲೋಬೊನ್ ಜಮ್ಲೆಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ. ಉಪ್ರಾಂತ್ ಸಂಚಾಲಕಿ ಭಯ್ಣ್ ಲವೀನಾ ಅನಿತಾನ್ 2021-2022 ವರ್ಸಾಚಿ ಕ್ರಿಸ್ತಾಂವ್ ಶಿಕ್ಷಣಾಚಿ ವರ್ದಿ ವಾಚ್ಲಿ. ಡೇನಿಯಲ್ ಇಗ್ನೇಶಿಯಸಾನ್ ದೊತೊರ್ನಿಚ್ಯಾ ಶಿಕ್ಷಣ ವಿಶಿಂ ತಾಚೊ ಅನುಭವ್ ಸರ್ವಾಂ ಸಾಂಗಾತಾ ವಾಂಟುನ್ ಘೆತ್ಲೊ . ಕ್ರಿಸ್ತಾಂವ್ ಶಿಕ್ಷಣ್ ಶಿಕೊಂವ್ಚ್ಯಾ ಶಿಕ್ಷಕಾಂಚಾ ತರ್ಫೆನ್ ಶ್ರೀಮತಿ ಡೋರಿನ್ ಫೆರ್ನಾಂಡಿಸ್ ಟಿಚೆರಿನ್ ತಿಚಿ ಭೊಗ್ಣಾಂ ಉಚಾರ್ಲಿಂ. ಉಪ್ರಾಂತ್ ವಿಗಾರ್ ಬಾಪಾಂನಿ ತಾಂಚೊ ಸಂದೇಶ್ ದಿತಾಚ್ಚ್ ಬಹುಮಾನ್ ವಿತರಣ್ ಕೆಲೆಂ. ಸರ್ವ್ ಕ್ರಿಸ್ತಾಂವ್ ಶಿಕ್ಷಣ್ ಶಿಕೊಂವ್ಚ್ಯಾ ಶಿಕ್ಷಕಾಂಕ್ ಉಡಾಸಾಚಿ ಕಾಣಿಕ್ ವಾಂಟ್ಲಿ .

ಭಯ್ಣ್ ಲಿಯೋನಾ ನಿಶಾ ಹಿಣೆ ಸರ್ವಾಂಕ್ ಧನ್ಯವಾದ್ ಪಾಟೈಲೆಂ . ಶ್ರೀಮತಿ ರೀಟಾ ಡಿ ಸೋಜಾನ್ ಸಗ್ಳೆ ಕಾರ್ಯೆಂ ನಿರ್ವಹಿಸಿಲೆಂ . ಸರ್ವ್ ಭುರ್ಗ್ಯಾಂಕ್ ಆನಿ ಶಿಕ್ಷಕಾಂಕ್ ಕಾಫಿ ಫಳ್ಹಾರ್ ಆಸಾ ಕೆಲ್ಲೊ.

Comments powered by CComment

Home | Parish | News | Sitemap | Contact

Copyright © 2013 www.rosariocathedral.org. All rights reserved.
Powered by eCreators