- ಆಜ್ ಆಮಿ ಸಂಭ್ರಮ್ಚಾ ಫಿರ್ಗಜ್ ಕೊಂಫ್ರಿಚಾ ಫೆಸ್ತಾಚೆ ತುಮ್ಕಾಂ ಸರ್ವಾಂಕ್ ಹಾರ್ದಿಕ್ ಶುಭಾಶಯ್. ಎವ್ಕರಿಸ್ತಾ ಥಂಯ್ ಆಮ್ಚೊ ಮೋಗ್, ಭಕ್ತ್ ಆನಿ ಭಾವಾರ್ಥ್ ವಾಡೊಂದಿ ಮ್ಹಣ್ ಮಾಗ್ಯಾಂ.
- ಆಯ್ಚಾ ದೇವ್‍ಸ್ತುತೆಚೆಂ ಮುಖೆಲ್ಪಣ್ ಘೆವ್ನ್, ಅರ್ಥಾಭರಿತ್ ಪ್ರಸಂಗ್ ದೀವ್ನ್, ಸಾಕ್ರಾಮೆಂತಾಚೆಂ ಆರಾಧನ್ ಚಲವ್ನ್ ವೆಲ್ಲ್ಯಾ ಬಾಪ್ ವಿಕ್ಟರ್ ಮಚಾದೊ, ದಿರೊಕ್ತರ್, ಗೊವ್ಳಿಕ್ ಕೇಂದ್ರ್, ಬಜ್ಜೋಡಿ ತಶೆಂಚ್ ರುಜಾಯ್ಚೆ ಆದ್ಲೆ ವಿಗಾರ್. ಹಾಂಕಾಂ ಫಿರ್ಗಜ್ ಕುಟ್ಮಾಚೆ ನಾಂವಿಂ ದೇವ್ ಬರೆಂ ಕರುಂ ಮ್ಹಣ್ತಾಂ ಆನಿ ತಾಂಚ್ಯಾ ಯಾಜಕಿ ವಾವ್ರಾಂತ್ ಧಾದೊಸ್ಕಾಯ್ ಮಾಗ್ತಾಂ.
- ಆಯ್ಚಾ ದೇವ್‍ಸ್ತುತೆ ಸಂಬಂಧಿಂ ವಿವಿಧ್ ರಿತಿಂನಿ ಅಧಾರ್ಸಿಲ್ಲ್ಯಾ ಸರ್ವಾಂಕ್ ದೇವ್ ಬರೆಂ ಕರುಂ. ಆಯ್ಚೆ ದೇವ್‍ಸ್ತುತೆಚಿ ಮಾಂಡವಳ್ ಕೆಲ್ಲ್ಯಾ ಆಧ್ಯಾತ್ಮಿಕ್ ಸಮಿತಿಕ್, ತಿ ಸುಫಳ್ ಥರಾನ್ ಚಲವ್ನ್ ವೆಲ್ಲ್ಯಾ ಬಾಳೊಕ್ ಜೆಜು ವಾಡ್ಯಾಗಾರಾಂಕ್, ಆಲ್ತಾರ್ ಸೊಭಯ್‍ಲ್ಲ್ಯಾಂಕ್, ಮಧುರ್ ಗಿತಾಂ ಗಾಯ್ಲಲ್ಯಾಂಕ್ ಆನಿ ತರ್ಭೆತಿ ಕೆಲ್ಲ್ಯಾಂಕ್, ವೆದಿಸೆವಕಾಂಕ್, ಇಗರ್ಜ್ ತಶೆಂ ವಠಾರ್ ಸಜಯ್‍ಲ್ಲ್ಯಾಂಕ್, ಪುರ್ಶಾಂವಾಚಿ ಮಾಂಡವಳ್ ಕೆಲ್ಲ್ಯಾಂಕ್ ಆನಿ ಸರ್ವಾಂಕ್ ಹಾರ್ದಿಕ್ ಧನ್ಯ್ ವಾದ್.
- ಆಜ್ ಸಾಂಜೆರ್ ಲ್ಹಾನ್ ಕ್ರಿಸ್ತಾ0ವ್ ಸಮುದಾಯ್ ಜಮಾತ್ಯೊ: ಸಾಂ ಪಾವ್ಲ್ ವಾಡೊ: ಜೇಮ್ಸ್ ಆಲ್ಮೇಡಾ: 4.30 ವೊರಾಂಕ್; ಪವಿತ್ರ್ ಕಾಳ್ಜಾ ವಾಡೊ: ಜೆಜು ಮರಿ ಕೊವೆಂತಾಂತ್, ಆರಾಧಾನ್ ಚಲವ್ನ್ ವ್ಹರ್ತಾತ್: 5.00 ವೊರಾಂಕ್; ಸಾಂ ಪೆದ್ರು ವಾಡೊ: ಹೆಲೆನ್ ರೀಟಾ ಡಿ’ಸೋಜ, ಮಂಕಿ ಸ್ಟ್ಯಾಂಡ್: 5.30 ವೊರಾಂಕ್.
- ಗೆಲ್ಯಾತ್ಯಾ ಆಯ್ತಾರಾ ಜಮೊ ಜಾಲ್ಲೆಂ ದಾನ್: ರು. 6,500/-
- ಹೆರ್ ದಾನ್: ಆಜ್ ವಾಪರ್‍ಲ್ಲೆಂ ವ್ಹಡ್ ಸೊಭಿತ್ Monstrance ದಾನ್ ದಿಲಾಂ, 2010-11 ವ್ಯಾ ವರ್ಸಾಚ್ಯಾ ರುಜಾಯ್ ಯುವ ಸಂಚಾಲನಾಚ್ಯಾ ಸಾಂದ್ಯಾಂನಿ ಆನಿ ಶ್ರೀ ಆಂಟನಿ ಡಿ’ಸಿಲ್ವಾ, ಸಾಂತ್ ಅಂತೊನ್ ವಾಡೊ. ಸಾಂಗಾತಾಚ್ ವಿವಿಧ್ ದೇವ್‍ಸ್ತುತಿಚ್ಯಾ ಕಲರಾಚ್ಯೊ ಕೊಲರ್ ಆಸ್‍ಲ್ಲ್ಯೊ ಮುಸ್ತಾಯ್ಕಿ ದಾನ್ ದಿಲ್ಯಾತ್ ಶ್ರೀಮತಿ ಸಿಂತಿಯಾ ಫಾರಯಸ್, ಫಾತಿಮಾ ವಾಡೊ.
- ಗೆಲೆತ್ಯಾ ಆಯ್ತಾರಾ ಗಾಯನ್ ಮಂಡಳಿಚ್ಯಾ ಮುಖೇಲ್ಪಣಾಖಾಲ್ ವಾಡ್ಯಾವಾರ್ ಮರಿಯಾಳ್ ಗಿತಾಂ ಸ್ಪರ್ಧೊ ಮಾಂಡುನ್ ಹಾಡುಲ್ಲೊ. ಹಾಂತುನ್ ಸರ್ವ್ ವಾಡ್ಯಾಗಾರಾಂನಿಂ ಕ್ರಿಯಾತ್ಮಕ್ ಥರಾನ್ ಭಾಗ್ ಘೆತ್‍ಲ್ಲೊ. ಹ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆತ್‍ಲ್ಲ್ಯಾ ಸರ್ವಾಂಕ್ ತಶೆಂಚ್ ಸ್ಪರ್ದೊ ಅಪುರ್ಬಾಯೆನ್ ಮಾಂಡುನ್ ಹಾಡ್‍ಲ್ಲ್ಯಾ ಗಾಯನ್ ಮಂಡಳಿಚ್ಯಾ ಸಾಂದ್ಯಾಂಕ್ ಶಾಬಾಸ್ಕಿ ಪಾಟಯ್ತಾಂ.
- ಹ್ಯಾ ಹಪ್ತ್ಯಾಚಿಂ ಫೆಸ್ತಾಂ: ಮಂಗ್ಳಾರಾ: ಆಮ್ಚಿ ಪಾತ್ರೊನ್ ರೊಜಾರ್ ಮಾಯ್
- ಹ್ಯಾ ಹಪ್ತ್ಯಾಚಿಂ ಕಾರ್ಯಕ್ರಮಾಂ:
- ಫಾಲ್ಯಾಂ ಸೊಮಾರಾ ಥಾವ್ನ್ ತೀನ್ ದೀಸ್ ಧಾವ್ಯಾ ಕ್ಲಾಸಿಚ್ಯಾ ಭುರ್ಗ್ಯಾಂಕ್ ಜೀವನ್ ಜ್ಯೋತಿ ಶಿಬಿರ್ ವಾಲೆನ್ಸಿಯಾಂತ್ ಚಲ್ತಲೆಂ. ಸರ್ವ್ ಧಾವ್ಯಾ ಕ್ಲಾಸಿಚ್ಯಾ ಭುರ್ಗ್ಯಾಂನಿಂ ಚುಕಾನಾಸ್ತಾನಾ ಹಾಜರ್ ಜಾಂವ್ಚೆಂ. ಫಾಲ್ಯಾಂ ಸಕಾಳಿಂ 8.30 ವೊರಾಂ ಭಿತರ್ ಸರ್ವಾಂನಿಂ ಹಾಜರ್ ಆಸುಂಕ್ ಜಾಯ್. ಮಂಗ್ಳಾರಾ ದಿಸಾ ದನ್ಪಾರಾಂ 2.30 ವೊರಾಂಕ್ Stress Management ಮ್ಹಳ್ಳೆವಿಶಿಂ ಎಕ್ ಶಿಕವ್ಣ್ ಭುಗ್ರ್ಯಾಂಚ್ಯಾ ವ್ಹಡಿಲಾಂ ಸವೆಂ ಆಸ್ತೆಲಿ. ಧಾವ್ಯಾ ಕ್ಲಾಸಿಚ್ಯಾ ಭುಗ್ರ್ಯಾಂಚ್ಯಾ ವ್ಹಡಿಲಾ0ನಿ ಥೊಡಿ ಪಾವ್ಟ್ ಕರುನ್ ಥೊಡೊ ವೇಳ್ ಭುಗ್ರ್ಯಾಂ ಸಾಂಗಾತಾ ಖರ್ಚುಂಕ್ ಉಲೊ ದಿತಾಂ. ಧಾವ್ಯಾ ಕ್ಲಾಸಿಚ್ಯಾ ಭುಗ್ರ್ಯಾಂನಿ ಮಿಸಾ ಉಪ್ರಾಂತ್ ಮಿನಿ ಹಾಲಾಂತ್ ಮ್ಹಾಕಾ ಮೆಳ್ಚೆಂ.
- ಪಿಡೆಸ್ತಾಂಕ್ ಕುಮ್ಗಾರ್: ಮಂಗ್ಳಾರ್, ಬುದ್ವಾರ್ ಆನಿ ಬ್ರೆಸ್ತಾರ್. ಸೊಮಾರಾ ದೀಸ್ ಕುಮ್ಗಾರ್ ಹಾಡ್ನ್ ಯೆಂವ್ಚ್ಯಾಂಕ್ ಹ್ಯಾ ಹಪ್ತ್ಯಾಂತ್ ಆಮಿ ಬುದ್ವಾರಾ ದಿಸಾ ಹಾಡ್ನ್ ಯೆತೆಲ್ಯಾಂವ್. ಬದ್ಲಾವಣ್ ಮತಿಂತ್ ದವರ್ಚಿ.
- ಬುಧ್ವಾರಾ, ಬ್ರೆಸ್ತಾರಾ, ಸುಕ್ರಾರಾ ಸಾಂಜೆರ್ ಶೆರೊತಿಣಿಚಾ ಫೆಸ್ತಾಕ್ ತಯಾರಾಯೆಚೆಂ ತ್ರಿದುವುಮ್. ಸಾಂಜೆರ್ 5.00 ವೊರಾರ್ ತೇರ್ಸ್ ಆನಿ ಉಪ್ರಾಂತ್ ಮೀಸ್ ಆನಿ ಪ್ರಸಂಗ್. ದೇವ್ ಸ್ತುತೆಚಿ ಜವಾಬ್ದಾರಿ ವಾಡ್ಯಾವರ್ ವಾಂಟುನ್ ದಿಲ್ಯಾ. ತಾಣಿಂ ವೆಳಾರ್ ಹಾಜಾರ್ ಜಾವ್ನ್ ಫಾವೊ ತಿ ಮಾಂಡವಳ್ ಕರ್ಚಿ.
- ಬುದ್ವಾರಾ ದೀಸ್ ಸಾಂಜೆರ್ ಮೀಸಾ ಪಯ್ಲೆಂ ಇಗರ್ಜೆ ಮುಕಾರ್ ಮರ್ಯಾಳ್ ಭಾವ್ಟೊ ಉಬಾರ್ತಾಂವ್. ಮಿಸಾ ಉಪ್ರಾಂತ್ ಅಜಾಂಪಾಚಿ ಸಾಯ್ಬಿಣ್ ಮಾಯೆಚಿ ಇಮಾಜ್ ಬೆಂಜಾರ್ ಕರ್ನ್, ಚೆರಾಲ್ ಪುರ್ಶಾಂವಾರ್ ವರ್ನ್ ಇಗರ್ಜೆ ಮುಕಾರ್ ಪ್ರತಿಸ್ಟಾಪಿತ್ ಕರ್ತಾಂವ್. ಫೆಸ್ತಾ ದೀಸ್ ಸಾಂಜ್ ಪರ್ಯಾಂತ್ ಅಜಾಪಾಂಚಿ ಸಾಯ್ಬಿಣ್ ಮಾಯೆಚಿ ಇಮಾಜ್ ಥಂಯ್ಸರ್ ದವರ್ತಾಂವ್. ತುಮ್ಚಿಂ ಅರ್ಗಾಂ, ತೆಸಾಂವಾಂ ಆನಿ ಕಾಣಿಕ್ ಥಂಯ್ಸರ್ ಗಾಲ್ಯೆತ್. ವಾತಿ ಪೆಟಂವ್ಕ್ ಆವ್ಕಾಸ್ ಆಸಾ. ವಾತಿ ತುಮ್ಕಾಂ ಮೆಳ್ಚಾ ಖಾತಿರ್ ಎಕ್ ರೆಲಿಜಿಯಸ್ ಸ್ಟಾಲ್ ಘಾಲ್ತಾಂವ್.
- ಬ್ರೆಸ್ತಾರಾ ಸಾಂಜೆರ್ ಮಿಸಾ ಉಪ್ರಾಂತ್, ಬೆಸ್ಪಾಕ್ ಆನಿ ಫೆಸ್ತಾಕ್ ದೇವ್‍ಸ್ತುತಿ ಚಲವ್ನ್ ವರ್ಚ್ಯಾಂಕ್ ಅಭ್ಯಾಸ್ ಆಸಾ. ಕೊಣಾಕ್ ವಾಚ್ಪಾಂ, ಪ್ರಸ್ತಾವನ್, ಬಾವಾರ್ಥಾಚಿಂ ಪ್ರಾರ್ಥನಾಂ ವಾಚುಂಕ್ ತಾಂಚಿಂ ನಾಂವಾಂ ನೋಟಿಸ್ ಬೊರ್ಡಾರ್ ಗಾಲ್ಯಾಂತ್.
- ಸುಕ್ರಾರಾ ಸಾಂಜೆರ್ 4.00 ಥಾವ್ನ್ 5.30 ಪರ್ಯಾಂತ್ ಕುಮ್ಸಾರಾಂ ಆಸ್ತೆಲಿಂ. ಆಮ್ಚೆ ಶೆರೊತಿಣಿಚೆಂ ಫೆಸ್ತ್ ನಿತಳ್ ಅಂತಸ್ಕರ್ನಾನ್ ಆನಿ ಕಾಳ್ಜಾಚಾ ಧಾದೊಸ್ಕಾಯೆನ್ ಸಂಭ್ರಮುಂಯಾಂ ಆನಿ ಚಡಿತ್ ಬೆಸಾಂವಾಂ ಆಪ್ಣಾವ್ಯಾಂ.
- ಸನ್ವಾರಾ ಸಾಂಜೆರ್ ಬೆಸ್ಪ್: 5.00 ತೇರ್ಸ್ ಆನಿ ಪವಿತ್ರ್ ಸಭೆಚಿಂ ಮಾಗ್ಣಿಂ ಸಾಂಗಾತಾ, ಉಪ್ರಾಂತ್ ಮೀಸ್ ಆನಿ ಜಳ್ತೆ ವಾತಿ ಸವೆಂ ಮರಿಯಾಳ್ ಪುರ್ಶಾಂವ್ ಆನಿ ಮಾನಾಚ್ಯೊ ವಾತಿ ವಾಂಟಪ್.
- ಬೆಸ್ಪಾ ದಿಸಾ ಇಗರ್ಜೆಚ್ಯಾ ಆದ್ಲ್ಯಾ ಬೆನೆಪೆಕ್ಟರ್ಸ್, ದಾನಿಂ, ಆನಿ ಗೊವ್ಳಿಕ್ ಪರಿಶದೆಚ್ಯಾ ಸಾಂದ್ಯಾಂಕ್ ಆನಿ ಫೆಸ್ತಾಕ್ ದಾನ್ ದಿಂವ್ಚ್ಯಾ ಸರ್ವ್ ದಾನಿಂಕ್ ಮಾನ್ ಕರ್ನ್ ವಾತಿ ವಾಂಟ್ತೆಲ್ಯಾಂವ್. ಆದ್ಲ್ಯಾ ವರ್ಸಾ ವಾಚ್‍ಲ್ಲಿ ದಾನಿಂಚಿ ನಾಂವಾಂ ನೋಟಿಸ್ ಬೊರ್ಡಾರ್ ಘಾಲ್ಯಾಂತ್. ಹಾಂತುಂ ಕೊಣಾಯ್ಚೆಂ ನಾಂವ್ ಸೊಡ್ನ್ ಗೆಲಾಂ ತರ್ ಬುದ್ವಾರಾ ಭಿತರ್ ತಿಳ್ಸುಂಚೆಂ.
- ಫೆಸ್ತಾಕ್ ದಾನ್, ಮುಡ್ದೊಮ್ ದಿತೆಲ್ಯಾಂನಿಂ ಬ್ರೆಸ್ತಾರಾ ಭಿತರ್ ಪಾವಿತ್ ಕರ್ಚೆಂ. ನಿಮಾಣೆ ಘಡ್ಯೆಚೊ ಗುಸ್ಪೊಡ್ ಚುಕೊಂವ್ಚೊ.
- ಯೆಂವ್ಚಾ ಆಯ್ತಾರಾ ಆಮ್ಚಿ ಫಿರ್ಗಜ್ ಪಾತ್ರೊನ್ ರೊಜಾರ್ ಸಾಯ್ಬಿಣಿಚೆಂ ಫೆಸ್ತ್. ತ್ಯಾ ದೀಸ್ ತೀನ್ ಭಾಷೆನಿಂ ತೀನ್ ಮಿಸಾಂ ಆಸಾತ್. ಸಕಾಳಿಂ 8.00 ವೊರಾರ್ ಫೆಸ್ತಾಚೆಂ ಸಂಭ್ರಮಿಕ್ ಮೀಸ್. 9.30 ವೊರಾಂಕ್ ಮಲಯಾಳಾಮಾಂತ್ ಆನಿ 10.30 ವೊರಾಂಕ್ ಇಂಗ್ಲಿಷಾಂತ್ ಮಿಸಾಂ ಆಸ್ತೆಲಿಂ. ಹ್ಯಾ ಸರ್ವ್ ಸಂಭ್ರಮಾಂತ್ ತುಮಿ ಚುಕನಾಸ್ತಾಂ ಹಾಜರ್ ಜಾಂವ್ಚೆಂ ಸಾಂಗಾತಾಚ್ ತುಮ್ಚ್ಯಾ ಸೆಜಾಚ್ರ್ಯಾಂಕೀ ಅಪವ್ಣ್ ಹಾಡಾ. ಹೆಂ ವರಸ್ ಜುಬ್ಲೆವಾಚೆಂ ವರಸ್ ಜಾಲ್ಲ್ಯಾನ್ ಆನಿ ವರ್ಸಾ ಮಧೆಂ ಸಬಾರ್ ಕಾರ್ಯಿಂ ಆಸ್‍ಲ್ಲೆ ನಿಮ್ತಿಂ ವರ್ಸಾಚೆ ಪರಿಂ ಹ್ಯಾ ವರ್ಸಾ ಸಾಂಜೆಚೆಂ ಸಾಂಸ್ಕ್ರತಿಕ್ ಕಾರ್ಯಕ್ರಮ್ ಆಸ್ಚೆಂ ನಾಂ.
- ಹೆರ್ ಕಾರ್ಯಕ್ರಮಾಂ:
- ಅಕ್ತೊಬರ್ ಮಹಿನೊ ರೊಜಾರ್ ಮಾಯೆಕ್ ಸಮರ್ಪುನ್ ದಿಲ್ಲೊ ಮಹಿನೊ. ರೊಜಾರ್ ಮಾಯ್ ಆಮ್ಚಿ ಶಾರೊತಿಣ್. ಘರಾಂತ್ ಖಡ್ಡಾಯ್ ಜಾವ್ನ್ ತೇರ್ಸ್ ಕರುಂಕ್ ಉಗ್ಡಾಸ್ ದವರಾ. ಸಾಂಜೆಚಾ ಮಿಸಾ ಪಯ್ಲೆಂ ರೊಜಾರಿಚೆಂ ಭಕ್ತಿಪಣ್ ಗ್ರೊಟ್ಟ್ಯಾ ಸಮೊರ್ ಚಲ್ಚ್ಯಾ ಭಕ್ತಿಪಣಾಂತ್ ಭಾಗ್ ಘೆವ್ನ್ ಆನಿ ಫಿರ್ಗಜ್ ಕುಟ್ಮಾ ಖಾತಿರ್ ಮಾಗೊಂಕ್ ಉಲೊ ದಿತಾಂ. ತಶೆಂಚ್ ಭುರ್ಗ್ಯಾಂಕ್ ರಜೆಚೊ ಮಹಿನೊ. ಭುರ್ಗ್ಯಾಂನಿಂ ಸದಾಂ ಮಿಸಾಕ್ ಯೇಂವ್ಕ್ ಆಸಾ. ಭುರ್ಗಾಂನಿ ಸದಾಂ ಮಿಸಾಕ್ ಯೇವ್ನ್ ಮಿಸಾಚ್ಯಾ ಬಲಿದಾನಾಂತ್ ಭಾಗ್ ಘೆತ್‍ಲ್ಲೆ ವರ್ವಿಂ ತಾಂಕಾಂ ಎವ್ಕರಿಸ್ತಾ ಥಂಯ್ ಭಕ್ತ್ ಚಡಂವ್ಕ್ ಸಾಧ್ಯ್ ಜಾತೆಲೆಂ. ವ್ಹಡಿಲಾಂನಿಂ ಹ್ಯಾ ದಿಶೆನ್ ಗುಮಾನ್ ದಿಂವ್ಚೆಂ.
- ಕ್ರಿಜ್ಮಾಕ್ ತಯಾರಾಯ್ ಅಕ್ತೊಬರ್ 13 ತಾರೀಕೆ ಥಾವ್ನ್ ಸಕಾಳಿಂ 9.00 ಥಾವ್ನ್ 12 ಪರ್ಯಾಂತ್ ಚಲ್ತಲಿ.
- ಅಕ್ತೋಬರ್ 19 ತಾರೀಕೆರ್ ಮಿಸಾಂವ್ ಆಯ್ತಾರ್. ಫಾವೊ ತಿ ತಯಾರಾಯ್ ಕರ್ನ್ ಮಿಸಾಂವ್ ಆಯ್ತಾರಾಕ್ ತುಮ್ಚಿ ಕಾಣಿಕ್ ಹಾಡುಂಕ್ ಆನಿ ಮಿಸಾಂವಾಂತ್ ಭಾಗ್ ಘೆಂವ್ಕ್ ಉಲೊ ದಿತಾಂ. ಹ್ಯಾ ವರ್ಸಾ ಆಮಿ ಫುಡ್ ಕೌಂಟರ್ ಆಸಾ ಕರ್ತಾಂವ್. ವಿವಿಧ್ ಖಾಣ್ ತುಮಿ ತಯಾರ್ ಕರ್ನ್ ಹಾಡ್ಯೆತ್.
- ಅಕ್ತೊಬರ್ 26 ತಾರೀಕೆರ್ ಸೆಮಿಸ್ತ್ರ್ ನಿತಳ್ ಕರುಂಕ್ ಶ್ರಮಾಧಾನ್ ಆಸ್ತೆಲೆಂ.
- ರುಜಾಯ್ಚಿಂ ಲ್ಹಾರಾಂ ಮಹಿನ್ಯಾಳೆಂ ಪತ್ರ್ ತಯಾರ್ ಆಸಾ. ಗುರ್ಕಾರಾಂನಿ ಯಾ ಪ್ರತಿನಿಧಿನಿಂ ವರ್ನ್ ವೆಳಾರ್ ವಾಡ್ಯಾಗಾರಾಂಕ್ ಪಾವಿತ್ ಕರ್ಚೆಂ.
- ದೈವಿಕ್ ಆಮ್ರತ್ ಮ್ಹಯ್ನ್ಯಾಳೆಂ ಪತ್ರ್ ನವೆಂಬರ್ ಆನಿ ಡಿಸೆಂಬರ್ ಮಹಿನ್ಯಾಂತ್ ಕೇರಳಾ ಆನಿ ವೆಲಂಕಣಿ ಯಾತ್ರಿಕ್ ಪಯ್ಣ್ ಮಾಂಡುನ್ ಹಾಡ್ತಾ. ಆಮ್ಚ್ಯಾ ಫಿರ್ಗಜೆಚ್ಯಾ ವೆಲಂಕಣಿ ವೆಚ್ಯಾ ಪಂಗ್ಡಾಂತ್ ಆವ್ಕಾಸ್ ಮೆಳೊಂಕ್ ನಾತ್‍ಲ್ಲ್ಯಾಂನಿ ಹೊ ಆವ್ಕಾಸ್ ಅಪ್ಣಾವ್ಯೆತ್. ತಸೆಂಚ್ ಜನೆರ್ ಮಹಿನ್ಯಾಂತ್ ಭಾಗೆಂವಂತ್ ಜುಜೆ ವಾಜಾಕ್ ಸಾಂತ್ ಮ್ಹಣ್ ಪಾಚಾರುಂಕ್ ಪಾಪಾ ಫ್ರಾನ್ಸಿಸ್ ಶ್ರೀಲಂಕಾಕ್ ಯೆಂವ್ಚೆ ಸಂಧರ್ಭಿಂ ಆನಿ ಹ್ಯಾ ಭಾಗಿ ಕಾರ್ಯಕ್ರಮಾಂತ್ ವಾಂಟೆಲಿ ಜಾಂವ್ಚೆ ಖಾತಿರ್ ಶ್ರೀಲಂಕಾಕ್ ಯಾತ್ರಿಕ್ ಪಯ್ಣ್ ಆಸಾ ಕೆಲಾಂ. ಆಸಕ್ತ್ ಆಸ್‍ಲ್ಲ್ಯಾಂನಿ ಮ್ಹಾಕಾ ಸಂಪರ್ಕ್ ಕರ್ಯೆತ್.
