ಜೆಜುಚಾ ಪವಿತ್ರ್ ಕಾಳ್ಜಾಚಾ ವಾಡ್ಯಾಂತ್ ಫೆಸ್ತಾಚೆಂ ಆಚರಣ್

2023 ಜುನಾಚಾ 11 ತಾರಿಕೆರ್ ಆಯ್ತಾರಾ, ಜೆಜುಚಾ ಪವಿತ್ರ್ ಕಾಳ್ಜಾಚಾ ವಾಡ್ಯಾಗಾರಾನಿಂ, ಸಕಾಳಿಂ 8.00 ವೊರಾಂಚಾ ಮಿಸಾಚಾ ಬಲಿದಾನಾಂತ್ ತಶೆಂಚ್ ಮಿಸಾಚಾ ಲಿತುರ್ಜೆಂತ್ ಭಾಗ್ ಘೆತ್ಲೊ. ಮಾ. ಬಾ. ಆಲ್ಫ್ರೆಡ್ ಪಿಂಟೊ, ಸಹಾಯಕ್ ಬಾಪ್ ವಿನೋದ್ ಲೋಬೊ ಆನಿ ಬಾಪ್ ಹೇರಿನ್ ಮಿಸಾಚೆಂ ಬಲಿದಾನ್ ಭೆಟೈಲೆಂ. ಸಾಂಜೆರ್ 6.00 ವ್ಹರಾರ್ ವಾಡ್ಯಾಚೆಂ ಸಹಮಿಲನ್ ವಾಡ್ಯಾಂತ್ಲ್ಯಾ ಗ್ಲಾಡ್‍ಸಮ್ ಹೋಮಾಂತ್ ಅಸಾ ಕೆಲ್ಲೆಂ. ಹ್ಯಾ ಕಾರ್ಯಾಕ್ ಮಾ.ಬಾ. ಆಲ್ಫ್ರೆಡ್ ಪಿಂಟೊ, ಸಹಾಯಕ್ ವಿಗಾರ್ ಮಾ.ಬಾ. ವಿನೋದ್ ಲೋಬೊ ತಶೆಂಚ್ ವಸ್ತೆ ಯಾಜಕ್ ಮಾ. ಬಾ. ಸಂತೋಷ್ ಡಿಸೋಜ ಆನಿ ಗ್ಲಾಡ್‍ಸಮ್ ಹೋಮ್, ಹಾಚೊ ರೆಕ್ಟರ್ ಮಾ. ಬಾ. ಲಿಯೋ ಪ್ರವೀಣ್ ಲಸ್ರಾದೊ ಹಾಜರ್ ಆಸ್‍ಲ್ಲೆ. ಫಿರ್ಗಜ್ ಗೊವ್ಳಿಕ್ ಪರಿಷದೆ ಥಾವ್ನ್ ಕಾರ್ಯದರ್ಶಿ ಶ್ರೀಮತಿ ಹೆಜೆಲ್ ಮಿನೇಜಸ್ ಹಾಜರ್ ಆಸ್‍ಲ್ಲಿ. ವಾಡ್ಯಾಚಿ ಗುರ್ಕಾರ್ನ್ ಶ್ರೀಮತಿ ವೀಣಾ ಸಲ್ಡಾನ್ಹಾನ್ ಹಾಂಕಾ ಫುಲಾಂ ದೀವ್ನ್ ಸ್ವಾಗತ್ ಕೆಲೊ. ತಶೆಂಚ್ ಜಮ್ಲೆಲ್ಯಾ ಸರ್ವ್ ವಾಡ್ಯಾಗಾರಾಂಕ್ ಶ್ರೀ ವಿಲಿಯಂ ಡಿಸೋಜನ್ ಸ್ವಾಗತ್ ಕೆಲೊ. ದೆವಾಚೆಂ ಉತಾರ್ ವಾಚುನ್ ಭಾವಾರ್ಥಾಚಿಂ ಪ್ರಾರ್ಥನಾಂ ಉಚಾರ್ನ್ ಫೆಸ್ತಾಚೆ ಕಾರ್ಯೆಂ ಪ್ರಾರಂಭ್ ಕೆಲೆಂ. ವಿಗಾರ್ ಬಾಪ್ ಮಾ. ಬಾ. ಆಲ್ಫ್ರೆಡ್ ಪಿಂಟೊನ್ ಮಟ್ವ್ಯಾನ್ ಫೆಸ್ತಾಚೊ ಸಂದೇಶ್ ದಿಲೊ ಆನಿ ಸರ್ವ್ ವಾಡ್ಯಾಗಾರಾಂಕ್ ಬರೆಂ ಮಾಗ್ಲೆಂ. ನಾಚ್, ನಾಟ್ಕುಳೊ, ವಿವಿಧ್ ಥರಾಂಚೆ ಖೆಳ್ ಆನಿ ಪ್ರತ್ಯೇಕ್ ಜಾವ್ನ್ ಹೌಸಿ ಹೌಸಿ ಖೆಳ್ ಮಾಂಡುನ್ ಹಾಡ್ನ್ ಸರ್ವಾಂಕ್ ಮನೋರಂಜನ್ ಕೆಲೆಂ. ಆನಿ ಜಿಕ್‍ಲ್ಲ್ಯಾಂಕ್ ಇನಾಮಾಂ ದೀವ್ನ್ ಉಲ್ಲಾಸಿಲೆಂ. ಸಗ್ಳೆಂ ಕಾರ್ಯೆಂ ಬರ್ಯಾನ್ ಜಾಂವ್ಕ್ ಕುಮೊಕ್ ಕೆಲ್ಲ್ಯಾ ಸರ್ವಾಂಚೊ ಶ್ರೀಮತಿ ವೀಣಾ ಸಲ್ಡಾನ್ಹಾನ್ ಉಪ್ಕಾರ್ ಭಾವುಡ್ಲೊ. ಹ್ಯಾ ಕಾರ್ಯಾಕ್ ಲಾನಾಂ ವ್ಹಡಾಂ ಮೆಳೊನ್ 55 ಜಣಾಂ ಹಾಜರ್ ಆಸ್‍ಲ್ಲಿಂ. ಹೆಂ ಸಗ್ಳೆ ಕಾರ್ಯೆಂ ಶ್ರೀಮತಿ ರೊಜಿನ್ಹಾ ಪೆಲೀರಾ ಮೊಂತೇರೊನ್ ಚಲವ್ನ್ ವೆಲೆಂ. ಮಾ. ಬಾ. ಲಿಯೊ ಪ್ರವೀಣ್ ಲಸ್ರಾದೊನ್ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೊ. ರುಚಿಕ್ ಜೆವ್ಣಾ ಸವೆಂ ಕಾರ್ಯೆಂ ಅಖೇರ್ ಕೆಲೆಂ.